Կոպերի վիրահատությունը՝ միգրենի բուժման միջո՞ց. news.am

Վերջերս իրականացված հետազոտությամբ պարզվել է, որ կոպերի՝ այսպես կոչված «խթանիչ» նյարդերի ապակտիվացմանը միտված կոսմետիկ վիրահատությունը ո՛չ միայն մարդու արտաքին տեսքը բարելավելու, այլ նաեւ միգրենի ախտանշանները մեղմելու հատկությամբ է աչքի ընկնում:

Հարկ է նշել, որ վերը նկարագրված միջամտության ընթացքում նաեւ կոպի բարձրացում՝ բլեֆարոպլաստիա է իրականացվում, հաղորդում է NewsMax Health-ը:

Մինչ այժմ միգրենի բուժման նպատակով առաջարկվող վիրաբուժական միջամտությունը մաշկի տակ ներառված նյարդերի նկատմամբ հասանելիության՝ գանգամաշկի միջով ապահովում էր ենթադրում:

Այդուհանդերձ, բազմաթիվ նյարդաբաններ եւ միգրենով ախտորոշված հիվանդների խնամքով զբաղվող մասնագետներ այն համոզմունքն ունեն, որ երկու այլընտրանքային տարբերակների պարագայում էլ հաստատուն արդյունավետության մասին խոսք անգամ լինել չի կարող:

«Կոնկրետ չափորոշիչներ ունեցող հիվանդների նկատմամբ իրականացման պարագայում բարդությանը հատուկ ախտանշաններում մեղմում է նկատվում», - համոզված է Լուիզիանայի պետական համալսարանին կից գործող բժշկական դպրոցի դոցենտ դոկտոր Օրեն Տեսլերը՝ հավելելով, թե հիշյալ բուժհաստատությանը դիմած միգրենով տառապող հիվանդներից 90 տոկոսի մոտ վիրահատությունից հետո իրավիճակի ավելի քան 50 տոկոսի չափով բարելավում է նկատվել, իսկ մեկ տարի անց 51 տոկոսի մոտ ախտանշանները վերջնականապես անհետացել են:

«Դրան գումարած՝ կոպի պլաստիկ վիրահատություն են անցել», - հիշեցրել է դոկտոր Տեսլերը, ով բուժհաստատության պլաստիկ վիրաբուժության բաժնի ղեկավարի պաշտոնն է զբաղեցնում:

Այդուհանդերձ, ինչպես արդեն նշել են, բոլորը չէ, որ վիրահատական միջամտության արդյունավետությունն են գովաբանում: Միջամտության նկատմամբ ընդդիմադիր դիրքերից հանդես եկող փորձագետների մի մասը նույնիսկ վստահ չէ, որ հիվանդությանը առաջացման համար վերը հիշատակված, ինչպես ասում են, թակարդի մեջ հայտնված նյարդերն են մեղավոր:

«Կարծում եմ՝ անմտության է ասել, թե նյարդը կարող է «թակարդն» ընկնել», - հայտարարել է Ցինցինատիի համալսարանին կից գործող բժշկական դպրոցի գլխացավի եւ դիմային ցավերի ծրագրային համանախագահ դոկտոր Վինսենտ Մարտինը: Նրա համոզմամբ, եթե նույնիսկ թակարդն ընկած նյարդը կարող է առնչություն ունենալ միգրենի հետ, ապա միայն՝ ախտանշանների վատթարացման հարցում: Ասել է, թե՝ չի կարող հիվանդության առաջացման պատճառ լինել:

«Բացի այդ, հետազոտությունն իր թույլ կողմերն ունի: Բոլոր 35 հիվանդները վիրահատության են ենթարկվել, այսինքն՝ երկրորդ՝ համեմատական խմբի մասնակցություն չի նախաձեռնվել, ինչը գիտական հետազոտությունների տեսանկյունից պարտադիր բաղադրիչ է համարվում», - նշել է դոկտոր Մարտինը՝ մեկնաբանելով, թե վիրաբուժական միջամտությունները մեծ հավանականությամբ կարող են «պլացեբոյի էֆեկտ» ապահովել: Այլ կերպ ասած՝ հիվանդներին կարող է թվալ, թե ավելի լավ են զգում իրենց միայն այն պատճառով, որ բուժում են ստացել:

Վերը հիշատակված հետազոտությունը, որի արդյունքները Plastic and Reconstructive Surgery ամսագրում են հրապարակվել, միջինը 46 տարեկան 30 կանանց եւ 5 տղամարդկանց շրջանում է իրականացվել:

Դոկտոր Տեսլերը վերապահում ունի, թե վիրաբուժական միջամտությունը միայն այն հիվանդների նկատմամբ պետք է կիրառել, որոնց պարագայում միգրենի առաջացումը գանգից դուրս ներթափանցած նյարդերի վրա ճնշմամբ է պայմանավորվում:

«Մենք պարզապես ազատ ենք արձակում նյարդին եւ այդ կերպ՝ գրգռման պատճառը վերացնում», - մեկնաբանել է նա:

Հետազոտության մասնակիցների մոտ վիրահատությունից հետո՝ չորս ամիս անց, գլխացավի առաջացման ամսական 18,5-ով պակաս դեպքեր են գրանցվել:

«Էական բարդություններ եւս չեն նկատվել: Բացառությամբ որոշակի թմրության, որ յուրաքանչյուր հիվանդ կարող է զգալ նյարդի՝ շոկի մեջ հայտնվելու պատճառով: Այն մեծավ մասամբ անցնում է եւ նվազագույն չափերի հասնում, ինչը, հիվանդների խոսքով, հրաշալի գին է՝ բարդությունից ազատվելու համար», - նշեկ է դոկտոր Տեսլերը:

Կոսմետիկ միջամտության բարդությամբ աչքի ընկնող վիրահատությանը արժեքը, կախված բժշկից եւ տարածաշրջանից, կարող է տարբեր լինել: Պլաստիկ եւ վերականգնողական վիրաբույժների ամերիկյան ասոցիացիայի տվյալներով, վիրահատության դիմաց պահանջվող միջին վճարը շուրջ 3 հազար ԱՄՆ դոլար է կազմում: Հիշյալ գումարի մեջ հիվանդասենյակի եւ ցավազրկման համար պահանջվող ծախսերը չեն մտնում:

Տեսլերի խոսքով, վիրահատությունը, որը երբեմն նաեւ բժշկական ապահովագրության շրջանակում է իրականացվում, կարող է 3 ժամ տեւել, որի ընթացքում կոպի վրա անցքեր են բացվում՝ պահանջվող նյարդերը որսալու եւ ազատելու համար: Վիրահատության ընթացքում նաեւ կոպերի ուռուցիկությունն է վերացվում՝ հիվանդին առավել երիտասարդ տեսք հաղորդելու համար:

Այդուհանդերձ, հետազոտության փոքր ծավալները հաշվի առնելով, դոկտոր Տեսլերը խոստովանում է, որ հետագա թեմատիկ ուսումնասիրությունների կարիք է զգացվում:

Հարցեր, պատասխաններ, մեկնաբանություններ